(i)
13-12-2021
博客空姐elaine 近來結婚了.
雖然跟佢三吾識七, 但早些年看了滿多佢寫的博客文.
佢那些從失戀中領悟的道理, 有些亦對自己有啟發.
霎時之間想到的, 會有這一句:
"要你等的人, 永遠不會等得到 ".
是至理明言.
看到旁人在感情世界幾經修練, 終於有一份成果, 自己雖然是一個三吾識七, 但亦莫名地高興.
百年好合, 琴瑟和諧.
自己那一筆, 雖然只能是遺憾, 但仍樂見別人幸福.
嗯, 從這個角度, 我還不是心理變態得極緊要.
------------
那間熱狗店的生意開始有一點起色, 雖然距離收支平衡, 我斷估仍有一大段距離, 每月應要蝕4-5 萬吧.
在這勢頭上, 要提點自己, 要出少句聲, 因為別人現在更加不容易聽取你的意見.
雖然, 我仍覺得, 下午茶餐牌和熱飲的選擇仍然很奇怪.
----------
因為幫忙熱狗店的緣故, 開了淘寶帳號.
在淘寶拿運費發票, 原來是一件屌佢老母臭X 的厭惡性工作.
特別是物流商按每一箱發一張發票, 而我則足足訂了48 箱紙盒, 一次又一次寄漏/錯單, 足足追了2 個星期才收齊48張發票.
幾十歲人才用淘寶, 有點吃力. 那裡的客服很不知所謂, 一開始老點, 令我只寄了 3 箱來香港, 剩下的還在深圳.
那天的星期六下午, 是我係追單的惡夢, 貨款是我用信用卡繳的, 冇貨到, 我向誰claim 錢?!
-----------
自己的業務似乎停滯在樽頸很久.
是時候, 自己要更進一步.
----------
戰友離開了工作室獨立已逾一個月, 對自己的影響大不大呢?
並沒有影響, 只是, 自己更難得地會有機會開口說話.
每天, 自己沉默的醒來, 又沉默的去睡.
----------
曾想過, 終止已有十多廿年的每月偽助養兒童捐款.
很ON 9, 往年竟會花心思寫聖誕卡給不存在/不會收到的受助養兒童, 閱讀"助養兒童寫的文字/學業".
那比起知道捐款當中逾半被用來養高層更難受.
再想想, 才作打算吧.
---------
雖然不會特意跟貼, 仍然會大概知道本地選女團的節目.
大熱的19 歲少女, 曾說自小迷韓團2ne1 , 看佢的表演舉手投足, 的確有CL 的影子.
很年輕, 對答應對得體, 像是天生是食演藝的飯, (不像有些參選者, 從改藝名便見到未ready從事表演, 像XX仔, 改這種名, 玩咩.)
當然, 別要問佢DSE 有幾多分.
我估, 除了英文, 其他都炒曬多.
-----------
雖然追捧女團就是生命, 我的新生, 我不會追捧新團 IVE.
感覺若追這團, 我會變了毅進類別.
在香港, you know what it means.
(ii)
14-12-2021
昨天才寫過結合, 今天卻寫別離.
今早, 在面書看到以前興趣班導師的太太過身了.
嚴格來說, 從不曾熟稔, 所以在這時節, 自己的態度也不多不少,中規中矩, 只留言說聲"保重".
私底下, 會想講甚麼呢?
是在別人眼中不中聽/犯諱的說話, 只會有被罵的份兒.
辛苦了, 照顧長期病患的家人是很不容易.
現在, 對你和你太太都是一種解脫, 彼此都免於身體及精神上煎熬.
雖然, 彼此都是很不捨, 不過傷心哭過了, 也還得接受.
希望你平復心情後, 未來隨著緣份, 能找到一個性情投契的新伴侶.
除非是你本身的意願, 否則 "從一而終, 今生唯一", 那只是別人對你的婚姻的期望.
實不必如此, 一個人獨自老去不容易.
若未能找到, 請也務必不要活得孤單, 多找朋友相聚.
願你慢慢走出傷痛, 好好的活著.
(iii)
19-12-2021
Jisoo 主演的劇集昨晚首播了.
在今年首爾初雪之日.
令成件事增添了一份奇妙感覺.
她的演技比曾估算的要好得多, 大概這集戲份的角色, 她完全可以借鑑以往練習生時期的經驗, 角色性格也恰好是她本人在團裡一樣, 不過在宿舍生活以來的戲份, 她亦演得很好, 並不生硬, 她定是下過不少苦功.
真的替她感到高興.
只可惜, 網絡的欺淩不休, 令她和劇團不得不低調.
曾期待被她的IG 劇照洗板已告落空.
真的很討厭那些網絡蛆蟲.
btw Disney plus 真的很垃圾, 介面,算法, 片庫都是.
所以從一開始, 只是月訂是明智的.
--------
有沒有訂明年的藝術節?
有, 一齣, 也就是莊小姐的劇本.
似乎, 現在人們看劇真的冷清了很多, 完全不見網站擠塞.
也不是的, 莊小姐另一齣, 黃生那套, 我便怎都買不到, 是故也無緣入場了.
吾知點解, 吾想又買黃牛了.
只可惜, 連帶劇本集也無法購買.
AGA 的演唱會, 已買票去聽, 吾知近來有一首合唱歌的姜生, 會不會做表演嘉賓?
期待?
當然不.
雖然我暗地裡卻自貼金面, "我和姜生其實有少少似, 我同佢身高都17X."
(iv)
27-12-2021
明天股巿又開了.
假期做了甚麼呢? 執過曬明年會用的excel sheets.
感覺還忙過累過平日.
做了這幾年都會做的事, 吃薄餅慶祝假期.
一個必勝客大批, 好邪惡, 但治癒.
這麼凍的天氣, 不想自煮, 未來數天吃大家樂算了.
當然, 這套韓劇都會準時收看.
如果十點播會好啲, 集集80/90 分鐘, 11點2開場, 看完都12點半...
第朝吾使起身番工咩...
這套劇, 如果不是人為蓄意挑起爭議, 其實應入選年度劇之列, 水準絕對可以跟陽光先生相提.
看完第5 集, 感覺是慶幸的.
一開始, 自己便相信Jisoo 吾會亂接劇去作為第一次做女主角. 她是團裡最穩重成熟的一個, 雖然愛爛搞gag , 結果也沒失望.
撇開那些控制以外的收視/酸民攻擊, 成個製作絕對是一線級別, 是女演員們都渴望演出作為首部擔正的劇目.
因為相信而沒後悔相信, 那種感覺是很美好的.
畢竟, 現實中, 相信換來失望的居多.
若說女主角演得難看, 近來李英愛新劇先叫難看.
鏡頭成日幫佢塊botox 臉特寫裝嫩!! 佢塊臉真的很難令人投入個角色.
同角色人設很違和, 是揀錯人演, 如果換了海岸村的股長那位女演員, 成個角色係會吾同曬.
-----------
近來, 自己入會成為Blink Fans Club 會員.
心知是搵笨多, 以The Movie 的往績, 我估都係得個會藉沒其他.
不過, 也只是貪圖有官方認證.
一如所料, 那位少女贏了造星4.
決賽片段, 再次肯定佢食呢行飯, 感覺佢係成精的老練, 知觀眾想要睇乜, 聽乜最順耳, 也知自己贏面本高, 就穩打穩紮/ 如果佢跳唱 Lalisa , Money 咁就真係勁到爆炸.
相比之下, 發覺柳生當初在造1參賽的造型, 來到依家, 在了解觀眾需要方面, 係吾得的, 佢應慶幸現在有經理人幫佢. 佢做導師真係害左人. 佢似乎吾明, 依家係viu 選女團做生意賺錢, 吾係林奕華, 鄧樹榮那類人選女團搞藝術. (btw, 今次搵梁生做導師, 都係錯的, 佢或者教到這些女子演藝心理, 但吾係教佢贏呢次比賽.)
lokman, 肥仔做導師, 出來的演出, 見到佢地兩個知道觀眾要乜, 想睇乜, 是歷練的世故人情.
柳生唱歌係幾好, 狂人日記嗰啲都好聽, 但了解觀眾和巿場就真係差左啲.
(v)
2-1-2022
開年第一件事.
我吾見左銀包仔.
?!!
係呀, 繼去年農曆新年吾見銀包, 一次過cut曬信用卡提款卡, 有幾日冇錢用後, 又嚟...
頂...
不過今年則只係吾見身分證和八達通, 信用卡提款卡現金冇事.
是自己失魂在小巴上跌了.
發覺自己overall 對成件事都尚算淡定, 燒完野食, 回程時先去小巴站找, 再打去警署問.
急, 自責...等負面情緒, 冇乜用.
any time 都要冷靜.
講就易, 做就難, 檢討番, 自己可再冷靜一點.
八達通增值, 當然要即刻 cut.
報失身分證, 補領, 當然要即刻做, 俾人查身分證時都有reason 話冇.
但補領時間, 卻推到今月中, 14 日內就算.
如果呢幾日俾人執到, 取消申請補領就省事得多.
-------
今天是三年來, 第一次和歌迷會的朋友聚會.
以前, 年年年底都會約埋出來燒野食的.
今年去大尾篤燒烤.
我上左小巴, 搭過左XX 站後, 忽然起疑, 點解方才群組裡有條友話, "在 XX 仲有泊車位", 吾係直接講"有車位", 講多左個地方名, (感謝以前睇過好些舞台劇本, 自己的捉字蝨技能提升)
我拿拿臨按落openrice 個餐廳地址...
我今次仆街喇...話就話大尾篤燒烤, 但間餐廳在 XX , 自己吾上心睇漏了.
急既結果, 就瀨野, 跌了銀包仔.
一落車, 摸一摸褲袋, 我就知出事.
我好似追Mirror 架車咁追, 但都追吾到架小巴...唉...(可能要追港版女團咁, 我先會跑快啲...)
以後要再冷靜啲, 一開始吾出錯睇漏野, 成件事就吾會發生.
出事後,應選擇最多咪搭到總站再搭番轉頭/ 即刻用手機拍低架小巴車牌, 吾夠冷靜依家衰多幾斤重.
所以冷靜下來, 就由佢吾見, 選擇搏回程時有奇蹟, 而吾係吾去燒野食, 死死氣即刻撲回大埔墟找.
雖然奇蹟冇發生, 但這個decision 卻是optimal.
-----------------
以前出來聚舊會講明星, 歌手, 社會時事.
現在多了一項, "你識的朋友裡, 有邊個移左民?"
11 個人裡, 個個都有.
所以, 臨走時, 我都特意要影大合照.
雖然我吾係鍾意影相的人.
因為, 吾知下次, 會不會再咁多人仍在這地方.
要合照留念, 是想到, 可能今次是餞別.
歌迷會裡, 已有一個移民去英國了, 為了下一代.
(vi)
2-1-2022
明天開始新的交易日了.
日常裡, 雖然灰, 這晚又一間報社被消失.
只能做好自己, 譬如今天瀨過既野, 以後不要重蹈覆徹.
人, 要有好多好多的錢, 才能有選擇的可能性.
我過得不好, 但是我會活著.
(vii)
3-1-2022
今天是Jisoo 生日, 和往年一樣, 跟其他的blinks 都會在IG, twitter 用約定的tagline # 發帖.
我係咪好迷 Jisoo 呢?
都是的, 佢做封面的韓語時裝雜誌會買, 只是那些太屈錢又不似, 索價2500元的手版模型才pass.
這一年, 每當Jisoo 一次過出幾個IG posts, 都會讓我有種只恨自己英文差的感覺.
adorable, gorgeous, elegant, beautiful, charming , lovely , cute...
是的, 是詞窮的感覺, 在想要讚美女子的時候.
雖說是迷戀, 但不是男女那種迷戀, 從沒幻想過她是潛在女神, 女朋友, 伴侶.
反而像疼愛晚輩那種親近.
是呢, 是以前自己亂七八糟的想法的緣故.
我以前會覺得, 假如 Sarah 生了一個女兒, 便應當像Jisoo, 遺傳了前者的基因.
幾年前的身型已吾似基因遺傳喎.
怎會呢? 已模糊的記憶(畢竟已有很多, 很多年沒見), Sarah 是很瘦的.
只是她身上的自信, 才讓人有豐滿的錯覺, 那些並不是脂肪來的, 是自信.
因為她自信, 使她更加美麗.
嗯, 我又講無營養的垃圾了.
認真的.
雖然不會再特意開post 寫以下這些了, 那只顯得自己造作.
而或許她早已於 1月1 日便上班見客, 現在才說亦有點遲.
仍希望她今年事事順心, 身體健康, 好好的.
(viii)
6-1-2022
聽過黎生首重唱版夏日傾情嗎?
是那時我年輕時代有數最最最紅的情歌之一.
(黎生的震音, 大概是那時好興震...李克勤, 張學友都震, 你吾識震音, 就顯不出是一線歌手一樣.
好像是這樣, 那時候.
就像GEM 那首泡沬, 便是跟IU 好日子差不多, 都勁飊高音. 當然兩者的公眾形象在出道之地而言, 是差了幾條街就是了)
首詞寫得讓人內心柔軟.
歌曲的意境很純粹, 思念所愛的人.
仆了那麼多次狠狠的街, 現在怎麼還會捨得亳無保留地對一個人用情如此?
怎都想為自己保留一點.
因為知道難得, 因為知道自己已失去那種能力, 所以更會懷緬.
寫到這裡, 按以往的習慣, 總會寫一點 "以前喜歡的人啊...想念她啊" 之類勁煩膠的...
(大家都去到要食鈣思寶的年齡, 再提其實真係煩膠的）
不諱言, 我是會想到的.
不過這一刻, 卻不想留下文字記錄.
在心中.
還好嗎? 今天的妳
(ix)
9-1-2022
識買, 梗係去天地買.
和商務同一價錢, 但多左簽名.
簽名有乜咁緊要?
可以扮有去睇, 現場簽名嘛.
唉...
陳生 (點解最正路的那位陳生卻只做了戲劇顧問/ 演員? ) 印像中, 手導是中規中矩, 吾會有驚喜.
預計, 舞台會落本啦 (英皇style 嘛) , 啲燈光應該又會俾人森七七啦, 有啲台位又吾合理啦.
自我安慰, 冇得睇又吾使真係咁sad 既...
btw 依家攬炒, 我冇得睇, 其他人都暫時冇得睇, 黑心為本我的, 卻又不會開心.
我要再黑心啲.
---------
近來, 面書吾少人係到曬, 佢陳年買落啲紅酒, 威士忌升值左幾多.
點解我以前只買普通野呢.
近來周末晚睇電視, 開了以前朋友送的茅台原酒, 好難飲, 第朝起身, 周身吾舒服.
酒, 係用嚟炒, 吾係用嚟飲.
---------
GOT 首Step back 真係好索, 男人都會愛看.
首歌吾好理韓文歌詞, 好像是含貶低女性, 若只是聽聲, 舞蹈打扮, 真係好正.
這個超級跨四代女團, 讓人忽然想到, 做有錢佬的好處係, 可以一次過有4個Gen 既女.
我如果一次過有4 個generation 既女朋友...一定會好開心.
我要努力賺錢!!!
如果只能得一個generation 做女朋友呢?
咁...我一定會揀本月少女!!!!
????!!!!
12 條女喎, 即係, 我可以食軟飯!!!
男人, 有得揀, 邊個吾想食軟飯呀...話吾想, 佢都傻既.
-----------
等了一星期, 我面對現實, 身分證真的不見了.
X!
幸好, 八達通已被註消, 也沒有盜用跡象.
----------
有朋友問, 做乜IG 又改username.
之前是dalgom 乜乜乜.
只是近來粉絲群新聞裡傳出, Jisoo 現在對狗隻過敏, 一摸佢養隻狗dalgom便會眼紅腫癢.
是難以理解為甚麼忽然過敏吧, 但就是這樣子.
這是令人傷心的事.
所以呢, 知道後就決定又又又又改名了.
免得讚佢靚時, 看到我username, 觸境傷情.
我知, 我知, 冇錢買followers 的我, 點會被推post 推到咁前被看見, 好勁架啲人, 買followers like 自己的comments 可以有幾千個.
不過亦覺得, 不是為了被知道被看見, 而是我覺得這是做人的禮儀.
其實, 邊鬼個care 我IG 呢..
不要把自己看得太重要.
(x)
17-1-2022
Jisoo 在劇內終於接吻了.
BP粉絲群裡, 自然十分轟動, 我的twitter, IG, FB 都被粉絲 teasing 的手繪畫洗版.
自己當然會感慨, 看到這被粉絲們捧在掌心呵護的女孩被男人輕薄.
不過, 由於不視她為女神, 只是喜愛疼愛, 所以並不呷醋妒忌, 而是覺得她大個女了.
智秀要拍拖了.
( OK, 丁生今次其實很斯文, 吻也只是吻她的上唇, 而不是封住雙唇, 點到即止, 和吻孫藝真那種禽獸狼胎猖狂渣滓又吻又摸又抄很不同, 我自己講到我好似係接吻達人咁...)
想又想, 自己要記住這種感覺, 記住看到Jisoo 和其他人接吻時的感覺.
自己的黑歷史裡, 曾遇到曾經喜歡的女子和男伴拍拖的場合.
被那位女子當作透明 (或者其實已不記得我是誰) 自然是必然的, 合情合理, 不過我記得那時候仍會偷偷望, 留意她的男伴是怎樣, 反向推想她原來喜歡這類型的男人, 內心五味交雜, 情緒忐忑, 身在現場感到很不自然.
雖然, 大前提只是巧合遇上, 並不曾刻意要遇見, 也不是想自虐.
那女子都當你透明, 還想這些, 想那些, 很無謂? 自找的活該犯賤?
是的. 我清楚知道.
所以, 我才說這是我的黑歷史, 到死那一天, 我都不會同任何人說.
不再有下次之餘, 也要記住看到Jisoo 和其他人接吻時的感覺.
要記住曾想用心對待的人有了另一半後, 那份坦然處之的情緒.
至少巧合遇上那一刻, 不需感到不自然 --- 關我鬼事咩, 識我係老鼠.
那管, 再見在現今似乎已是無期.
