11-5-2020
五月, 是這些年來, 每年都會訂第二次蛋糕的日子.
隨著年紀大, 家人不想吃太多蛋糕, 所以近年都改為買件裝.
今年揀了這一家.
是看IG 廣告時留意到.
款式好似好特別咁.
在資料搜查時, 發現間店是黃的, 加添一絲好感.
後來, 發現報道裡店主英文名叫Sarah.
我即刻加50 分俾佢!!
並立即決定訂一打, 準備分給家裡和工作室裡的人.
以前想追過的女子, 名字裡都有些共通點.
有" 嘉" , 有"慧" , 有" 儀" .
好像如果女子的名字發音是這樣子, 那個人本身會很吸引似的.
所以那刻直覺覺得, 叫得"Sarah"的 — 即使沒有我曾經喜歡但追不到的那一位現象級女神娘娘般, 善良溫柔, 大方爽朗, 感性亦知性, 充滿氣質, 聰明而堅強, 優雅動人, 美麗迷人, 性感身材好, 才多才藝, 是若哪一個幸運兒能追到她, 人生便可減少奮鬥三十年的瑰寶—
就打個一折好啦, 整出來的糕點都應認真製作可以放得入口的, 吾似今年三月時訂蛋糕那間咁hea 我.
事實上, 睇報導相, 店主算年青, 都靚的, 沒有毀掉 "Sarah" 呢個招牌.
(但應該真人比宣傳照胖, 叫得ton 喎, 體重應該噸噸聲啦...)
最終好不好吃呢? 送貨不會有交帶, 吾使我追債咁追呢?
下星期就會知了.
(我現在仍然這樣讚美以前曾喜歡的人,是不是很痴線?
不會啦, 講事實罷了. 我吾講, 地球人也會覺得她很好.
況且, 她又不會知道, 她已變得很遙遠了)
(ii)
11-5-2020
自己IG 很少出post , 主要看韓妹女星, 全部都是韓文, 有了抽離的空間.
近日, 卻很愛看黃偉文的IG.
post 了不少填詞的初稿, 引來其他人甚至一級歌手來玩埋一份, 很互動.
也知道原來廣東歌的合樂是甚麼一回事.
前日看HOCC live gig , 佢哥哥咩歌都識彈, 原來也是合樂的緣故.
(iii)
17-5-2020
植入式廣告, 雖然俾左錢啫...但都吾好咁啦.
套劇餐餐食炸雞, 李敏鎬餐餐食炸雞, 飲極hard sell皇室牌咖啡.
咁搞法, 皮膚好難保養得好喎...
咁...
在現實世界, 咪隨時變做我呢挺痴肥麻甩中佬囉!!!?
我人生忽然又有了希望.
中女港女們, 你睇電視勁冧李敏鎬, 沒問題, 睇完熄電視後, 記住冧埋線下版既我呀...
我係食左一百萬次炸雞飲左一百萬次咖啡的李敏鎬呀...
收皮啦我...
不過真係有點拖...吾知點解.
btw, 我估中左王叔死左.
那男人的記憶法.
應該製作費吾夠, 去曬女主角的costume 名牌費到, 最後一集好求其.
btw, 編劇都好求其.
大佬, 依家有skype, whatsapp, facetime , 女主角去了美國發展演藝事業, 就完全和男主角聯絡吾到...
女二和男二要寫實體信?
撚化我咩.
OK, 我其實只係為左睇文佳煐.
男主角好老.
大婆復仇劇, 點解好多時橋段都會係, 大婆被拋棄後華麗轉身, 個賤男回頭發現原來大婆好正喎, 想復合但被拒絕?
總覺得, 呢種大婆自我感覺良好的 FF 現實裡, 係吾會有囉, 尤其是如果大婆期間已有新歡, 賤男只會想一夜情發洩獸慾囉.
曾有人說得很對, 不被愛的, 才是第三者.
愛情是很殘酷的.
愛情雖然有時係, 你鍾意某一類型的人, 就算仆過幾多次街, 都會繼續鍾意番同一類型人.
但係如果是男人, 會揀個後生啲架囉. 你估啲女人咁咩, 17 歲時冧城城, 到40 幾依然冧城城.
即係, 男人十五年前若會冧全智賢, 十五年後, 即使仍喜歡同一類型, 但只會鍾意文佳煐囉.
反正整容實整到.
也許就是這原因, 自己沒太大動力去追看我老婆套劇.
初戀大曬咩...咪天真啦.
若要追回初戀的感覺/回憶, 係應搵番同初戀時對象年紀一樣大的女孩/女兒/孫女, 吾係依家變左大媽的姨姨.
呢啲先正常架嘛.
變成大媽果啲, 今日搽左潤手霜未呀...
認真的, 如果你曾經很喜歡一個人, 現在還是惦記, 不妨想一想, 問自己一個問題.
當你站在她面前, 她會開心嗎, 會笑嗎?
如果你有答案, 就應該像被淋了十幾盆冰水, 即刻收聲, 只能沉默.
只是曾經喜歡, 不是愛戀.
-------
The Complicite 的the encounter 網上錄像, 只看了一會, sound effect 係正, 好立體, 但吾知點解, 冇乜耐性看下去, 我知係好野嚟.
溝吾到女架...吾睇呢啲...
唉...灰.
-----------
本地網上兩個讀戲, 也沒有心機看.
結論係, 在家看錄像會心散, 也欠了現場感.
------------
看了雲門的水月, 很美, 好好看, 舞姿輕柔若水. 鏡花水月的詩意.
-------------
沒有嘗試去買杜生的talk show , 因為實買吾到, 就無謂開巿時間分心.
反而訂了以前興趣班導師去年底取消演出的戲的八月再次上演.
吾知到時會不會上到呢?
好難講喎...唉....
(iv)
20-5-2020
幾OK 喎.
服務有交帶, 跟足要求, 準時.
朱古力皮不甜, 味道還不錯, 不太甜.
是可以有下次的餅店.
工作室裡的師奶似乎未見過這種玩味十足的蛋糕.
反應有點雀躍, 可能平時都是地盤生活圈子, 西餐貴少少都是去酒店自助餐.
忽然間, 明瞭點解啲男人鍾意後生女.
因為閱歷見聞未深, 所以容易覺得驚喜.
你試下搵個做了十幾年金融高層大媽俾呢啲野佢睇, 人地生活圈子係講緊瑪莎拉蒂代步, 食牛腩只食爽腩角 , 茹素係講緊BYND 吾係十九齋舖的齋燒鵝, " 個蛋糕係呢度係有啲特別, 但係巴黎女人街間暗角cafe 通街都有得賣, 普通野嚟咋喎..."
所以溝條中女, 變左一件好大壓力的事.
痛定思痛, 要知道一個女人對自己有沒有好感, 其中一個特徵是, 條女肯不肯扮傻變笨.
# 這幾年, 我已沒有機會溝女的真正原因, 條條女係我面前, 都精過鬼
------------
加場後, 有朋友問去不去看杜生, 結果最後卻只有我自己去看.
張飛好貴...
買飛時, 個巿反彈, miss 了388 低位反彈, 吾見了幾千銀.
唉...
要專心.
(v)
21-5-2020
今日指數跌少少, 但熱炒的股份板塊卻回吐不少.
早一個月前, 朋友叫我買的股份...跌.
這一個月以來, 冇升過, 但只有跌, 成交疏落.
伏味極濃.
我當然沒有買, 汲取教訓, 這輩子早已斬手指不買成交量低的股份, 搣甩了以前舊公司染上的不良習慣.
這個多月來, 朋友已沒有往來.
看著這隻股票走勢, 忽然覺得很累, 索然.
好似wechat 裡叫你買某隻股票, 然後失蹤的人.
(vi)
22-5-2020
太多事兼顧, 今天才記得要買劇季新戲票.
一年比一年買得少.
也開始只揀星期六.
星期五真係好重要, 成枝weekly chart bar 的pattern 就係講今日.
今星期是最明顯的.
結果興趣班導師那套是must 架啦, 但星期六晚場次就爆到差啲買吾到.
然後就是兩套黑盒, 冇揀果套也是很明顯, 記仇的我, 仲記得一板之隔, 今次原班人馬?!, 算吧.
主劇目其餘四個劇目, 我又吾係老人痴呆, 點會再看那兩個已重演過, 看過兩次呢?
錢多都吾係咁花, 去看導演演員的變化吧, 況且我根本冇錢.
另一個, 導演/編劇這幾年早已blacklist. 至於invisible man , 很多年聽過讀戲, 已無興趣, 現在依然吾會有.
聽日, 出街時, 要記得去戲院買蜷川幸雄, london life.
IFC 安全啲卦? 胡椒啫, 吾會爆缸.
或者咁講啦, 正常啲, 啲觀眾.
去 the one 係先天不足, 係差啲, 啲遲到係前面經過, 遮住屏幕, 阻住曬.
btw , 中英繼續悶, 今年啲戲.
(vii)
22-5-2020
社會低氣壓.
屌就廢事屌了.
跟朋友聊起, 只會說, 要鬥長命, 要堅持信念, 並成為有份量的人.
要成為有份量的人, 才能在必然發生的獨裁者死後, 群鬼權鬥中, 成為被拉攏對象, 有討價還價的餘地.
(viii)
23-5-2020
去到第11 集結尾, 皇帝救條女那一幕.
垃圾.
完全為了型而破壞劇情.
收視低係有原因.
-------------
中午去了IFC.
也去了大會堂.
在太子大廈附近, 行人疏落, 比起往昔晚上十時還要少.
不由得郁郁.
(ix)
24-5-2020
賭輸左, 最多吾去, 吾見六舊水啫.
到時,自己冇錢去, 多過當地吾開門.
冇人頂得順十二月仲封城, 亦應吾使隔離14 日卦, 已半年喎.
今月底到期的asia miles 積分, 要我用嚟換其他野, 我條氣會好吾gur.
我儲了咁耐積分只為換機票.
還是愛淩晨機出發, 很有飄泊孤單feel.
覺得好像挺適合獨來獨往的自己?!
反正, 自己在夜裡已很久沒有睡得好, 成日忽然醒來.
係咪冇心冇肺?
今天居然去揀機票.
吾係可以點? 就算BNO 乜乜, 你慌會包埋我呢啲低端人口咩.
要提醒自己, 環境就算多壞, 首先, 仍是冷靜下來, try my best 做正確的決定.
例如吾好再簽乜鬼change petition.
保持冷靜, 不要衝動做決定, 是這兩年仆街的經驗, 雖然離修成正果仍很遠, 但是方向是清晰無誤.
(x)
26-5-2020
還有半年時間, 已開始想在大阪會去那裡.
我想去岡山後樂園, 倉敷美觀, 去水族館, 去天空瞭望台, 去有馬和新垣結衣一齊浸溫泉, 去京都...
十日好易plan , 我諗到時我只會下午才出門, 早上在酒店/BNB 炒陣窩輪搵旅費.
生活裡, 有些期待, 是好的.
那管事情是很渺小.
(xi)
31-5-2020
全世界冇外國護照都在申請補發BNO, 吾通全世界個個都想搞咩.
我突然有了阿嬌式無奈.
當然不會白痴到以為會有居留權.
一句到尾, 你有1億身家, 在當地消費, 製造有質素的就業機會俾當地人sss, 咪有囉...
我有自知之明.
死窮鬼.
只是想擸多本護照, 將來特區護照變垃圾, 效用跟內地睇齊時, 旅行方便些.
歐洲至今的反應, 給我的感覺似應對納粹的堀起咁.
年年二戰反思, 到頭來, 都是門面野.
人性, 就是心存僥倖, 賺多筆錢先算.
老土野吾講了, 邊個邊個欺壓吾制止, 跟住落, 到自己出事時就再冇人制止....
我都吾例外, 希望幾年後可以甩到身, 移到民, 十二月若去得成旅行, 我諗, 我會加入睇樓節目.
世事豈會盡如人意.
但是, 我冇資格怨.
---------
申請補發時, 才發現自己對上一兩代的事完全不了解.
我不知道父母何時結婚.
我不知道祖父母的名字.
來來去去都係祖藉新會, 從未回鄉, 而上一次去內地都是幾年前的事了. that is all.
