(i)
21-4-2018
說我迷信也好, 有時覺得啲野係整定.
自己的手機其實在忘了那時候, 在5月21日設為最後辭職遞信日.
現在, 不過是早了一個月.
近來讀的舞台劇劇本, 叫 Die Firma dankt.
(我讀的是台灣譯本, 感覺譯得麻麻, 若廣東話直用演出, PK 收場是肯定)
近數月, 工作不開心, 成日想辭職, 也是預告吧.
好厭, 係咪 ? 我成日係呢度呻想辭職.
呻到落葉喇...
早前看辦公室傢俬, google 工廈蚊型私人辦公室, 數算還有多少年假用來做代通知金.
累積起來, 有一定的心理準備, 令自己個人心情定神不少.
也不算太差, 至少同事共同進退.
很多人說好來好去, 所以不應再批評那裡問題.
也是的.
只是, 不免回想, 昨天是按一個劇本的scene, 一入房我還未講野, 便開始被轟炸, 完全不聽解釋.
言語間, 聽得出有人查了戶口交易記錄.
一早有定論, 其實多說無謂.
我和同事中伏, 俾GM 早前的工作指示範本跣了.
這麼多年直行直過, 現在卻來算帳.
.
嗯, 落差好大.
早上才說表現良好, 加薪 % 是最高那批, 下午則變成白拿工資, 搵佢著數.
都有啲心淡. 朝七晚十一都會覆message, 咁都叫白拿工資.
you are only as good as the last trade.
份野都交左囉.
看著GM 事後陰陰嘴走過來搖頭, 一副"做乜你地咁吾小心呀".
就係咁囉.
今天忙著一大堆雜事, 認真一點搵辦公室, 準備開一直想開的交易戶口, (以前還想有"道義"而沒有開), 了解它們複雜的指令介面.
對未來的未知總不免有點擔心, 但是現在若不趁機改變.
十年後, 我一定會後悔, 並且死得比現在更慘.
我知道.
未入來之前, 我曾在一間公司學做 trader 炒美股.
那時的老闆炒科網時期發達, 炒option 賺了十億.
我, 當然, 不成功.
那時候 (十幾年前了) 暗戀一個大學同學, Michelle.
佢年紀和她一樣都大過我 , 76 年, 那時已達適婚年紀.
很傻的, 我想拉近距離.
現在, 和感情無關, 也無法有關.
我只想有能力, 看看另一個社會階層的生活及這個世界.
我也鍾意因為要做這件事, 生活習慣的規律和要求的自律.
這算是夢想, 我在重拾夢想吧.
VIDEO
(ii)
22-4-2018
做朋友的,
快樂時, 相處容易.
患難時, 仍在旁的卻是珍貴.
吾知呢, 好似預左水靜河飛, 沒有太大感覺.
都算成長吧, 又不是第一次類到困難不安時, 別人時運高會走開.
我不是通街講吾做啦, 只是有實際需要才告訴朋友.
(iii)
22-4-2018
今天很感恩, 大姐的朋友肯借地方給我和同事免費落腳.
今天下午實地去看環境.
地方很好, 夠大有窗. 位置只是在 Island East 後面, 太古站一出三分鐘內到.
已有辦公室枱椅, 有牌子 Posh , 係幾好坐的, 呢度工作間setting 自己俾錢應要五六千蚊.
現在只要搬電腦入去插條lan線便用得.
若要自己拿錢出去租, 每月至少1萬元, 都未必得.
現在的微型辦公室, 茘枝角/葵興工廈區, 面積少一半, 每月都3, 4000蚊啦.
省回不少錢固然重要, 雪中送炭, 卻實在令人感動.
跟同事說, 將來要知恩圖報, 不要老馮.
那位朋友...嗯, 我估, 我不敢問, 實俾大姐鬧, 佢應是大姐的partner.
二十多年前見過, 我真係見過, 那時我讀中學, 三姐也曾在佢公司做暑期工.
為甚麼沒有結婚? 為甚麼新年沒有見....為甚麼...
我點知啫...
可能, 純粹soulmate , 可能有婦之夫呢, 可能佢地的默契共識呢.
呢個世界的感情關係, 係可以比編劇想像力更要複雜.
二十多年都係咁, 當事人應已接受適應.
當事人覺得OK 便好.
我咁多口評論做乜呢, 我好好咩?
我娶到全香港所有港女都視為幸福模範和終極目標的 "徐子淇" 咩?
我只能FF Gal Gadot 囉.
-----------
跟老闆的兒子單聲準備辭職.
不過跟佢講明, 我不想講我辭職原因的版本, 因為我真係當佢朋友.
怎都說不通的, 在朋友面前數佢老豆點點點...佢面子好看嗎? 你叫佢點俾反應?
after all, 親情最緊要, 我無謂講呢啲野啦...佢又梗耳, 係咪.
朋友叫我明天講價還價才真係辭職.
唉...我邊位呢? 又吾係第一日幫佢做野.
我覺得我清楚過朋友囉.
好強的人係吾會妥協的, 佢吾會接受講條件.
佢覺得妥協, 其他人會打蛇隨棍上, 有樣學樣...
佢的世界是很多陰謀論的...人人都有動機偷呃柺騙...
同埋, 邊個得閒邊個做之嘛...係佢眼中.
(iv)
23-4-2018
計劃總是趕不上變化.
本來是今天辭職, 只是知會頂頭上司溝通後, 也覺得新股首日老闆很忙, 沒時間處理, 只有躁的份兒.
等到星期三新股塵埃落定, 大家能心平氣和談這件事, 好來好去.
我本是這樣想的.
不過剛才, 知佢今天得閒到想找IT 查證我用電腦做過甚麼, 去過那些網站.
具體點, 想知有沒有用其他行家在第二度炒股.
同事暫時幫我擋了一會, 說只知造訪地區不知網址, 要時間找找.
Big brother is watching you.
心有點微寒, 但更多更加心淡.
使吾使呀...我邊位呀? 你講過咩秘密我知呀?
是呢, 計劃又要再變化.
總不能讓別人找到話柄, 羞辱一番才離開.
好灰吧?
所以只能在這裡呻一呻....免得污染地球.
(v)
23-4-2018
以前學樂器時的老師數月前公告離婚.
今日因事, 佢爆seed 說前夫偷食.
原來因為咁而離婚, 才結婚不到二年.
烈女啊...
乜現在仲有女人因為老公偷食而離婚架? 吾係一般當睇吾到, 識回家就得架咩?
咁, 我又吾係啲八公講埋曬啲咩 "一段關係要雙方維持, 男人出去滾, 女人都要檢討..." blame the victim 咁口賤咁衰.
吾好睇老師咁"硬淨", 其實佢都好傷吓, 未好番先至會爆seed.
但係男人去滾, 似乎係天性.
音樂人都係感性, 有才華, 若又飲大左...有女冧你肯獻身喎...
金融業, 要傾deal 果啲都係...成場都係女喎.
今天和頂頭上司談話時, 見佢如數家珍講中環人去蒲邊啲夜場, 咩逢係港女基本上不出街, 賣面孔不賣身, 不准摸, 不准攬, 不准摷, 只准搭膊頭, 又給一大堆女郎照片....
我只有"原來係咁" 的份兒.
問心, 係年輕又靚, 周秀娜, 鄧月平果啲級數.
但幾乎為跑deal 晚晚一點才第三場宴會...聽到都覺辛苦.
我估上司過多一兩年, 會入股做夜總會小股東, 方便傾生意, 又顯示有頭面, 五十歲後, 同老婆離婚, 反正兒女都大了, 想追回青春...
係囉...講真我鍾意女人架...
只是對這些五光十色, 雖係八卦, 但卻沒有入過去光顧.
咁又吾係止係孤寒既, 男人身痕上嚟, 變禽獸, 點會仲睇錢做人.
或者我會覺得, 我鍾意那類型的女人, 係吾會忍呢啲沙沙滾, 或者有這些黑歷史.
我都幾ON 9 的....人影都未見到就諗咁多.
(vi)
24-4-2018
終於遞了信.
發覺自己其實都吹得下, 有啲語言偽術的天份.
被問呢度有乜好吾好, 想走, 條件可以談.
" 我吾覺得我有身份資格講條件 (低姿態, 費事刺激佢) , 手板眼功夫之嘛, 呢度好有人情味, 只係我想離開comfort zone..."
死都吾彈呢度有乜吾好, 自己有乜要求才留下.
"comfort zone" 真係幾好的職場字眼發明, 絕口不提現職公司的不滿, 只係它太"comfort" 才想走.
呃鬼咩...
但都好來好去嘛, 這是我的 objective.
之後, 都被提offer .
人工減半, 佣金有得傾, 屬自由身, 開巿時間不打擾, 若炒得好, 還可以打本...只係幫佢做 research.
坦白講, 我曾有一刻動搖, 只是, 想離開這裡的心仍強烈, 所以拒絕了.
事後, 才有時間想清楚, 明白根本呃人. 冇可能兌現!! (我真係轉數慢, 和不習慣跟這類人打交道)
我職位正式工作量不多, 所以若咁樣, 其實人工減半, 工作量依舊!!!
至於炒得好會打本, 我頂頭上司掛名做投資經理, 幾時見過佢有權投資...
同埋, 若肯扔舊錢出來, 我朋友都不會現在仍不回來啦....
佢連佢都吾信...都吾制...我邊位呀?!
同埋之前, 有個同事都係咁, 被說服減人工改term 留下.
依家, 有找數咩...
花言巧語, 真係幾誘惑, 要抵住, 真不容易.
還好, 堅持住一定要離開的, 不在這裡呆的底線.
只係呢, 我都答錯了, 若將來有問題, 都會答佢...
事後俾同事怨, 咁講手尾長...
到時得閒咪做一陣囉...有問野都收巿覆囉...再過一陣咪直接話忙吾做囉...
whatsapp 講易過現在沒了沒完的被chok, 若不敷衍, 真係吾會咁易俾我地走.
佢講埋啲野又會找數咩...
面對未知, 的確有點忐忑不安, 但總要試試看.
今天冇炒股票, 因為我的報價電腦被block 上網域, 好多地方都去不到.
要到中午才正常, 但下午大局已定, 短炒值搏率一般, 也要準備辭職對白.
吾知係咪得我咁呢...
例如有人監察又整錯setting, 我不假設了.
但整個早上, 我是"盲" 了.
所以, 雖有點可惜, 我本應都執到啲...
但也感受到被"鍊住喉嚨"感覺.
(今天電腦, 我不肯用skype, 瀏覽器用完也刪除記錄, 手機也不上公司wifi.
昨天幸好是IT 頂了一次, 不能預計每次都幸運啊.
但搞到返工好似坐監, 返左內地囉...)
很荒謬的, 出了房門, 聽佢同秘書講, 昨日嚟見工的人係咪只識講普通話...
並隨口說要我幫忙第二次面試.
昨日, 我都未遞信!!!!!!
即係...係上星期之前, 已一早想請人/炒人囉...
忽覺得好險, 也夠決心和堅定.
幾難挨...咁樣推敲, 算來算去...
若有心力精力, 應做有生產力搵到錢的事上去.
而不是大家都提防留一手.
(vii)
好多人都買到黃子華...主要朝早五點幾便去葵青排街...
諗下...如果我有兩張黃子華...咪可以約個中女姐姐去看...
約吾到Gal Gadot 都有個Gel Gadot 卦?
後世的歷史會咁寫....我呢世都冇女, 原因係咁悲壯...因為買吾到飛.
冇樓, 冇車, 冇狗, 冇貓, 冇淘寶account ...依家連黃子華啲飛都冇...
港女腔: 呢啲 (我) 男人吾死都冇用...
我真係有試過買...但今日都忙和煩吓...
回到家再試, 只剩輪椅位囉...俾得你入到網站梗係呢啲位啦...
(viii)
25-4-2018
辭職有幾難呢?
計算可用作代通知金的假期扣除...
在現在的公司是很難的.
因為, 那些記錄, 只得那個負責的同事才看得明白....其他人如我看, 是外星文...
(算不算職場自我保衛手段 ? 炒佢, 即全公司啲人都吾知點計假期...)
佢放假...咪即係我冇得計幾時走得囉...
還好, 一個月內怎都走到.
今天做得不好, 不夠平常心, 太想追回.
(ix)
25-4-2018
她今天工作很辛苦很累嗎?
她已很厲害, 一個頂幾十個人了.
保重.
(x)
如果, 出來後不成功怎麼辦?
吾係好景果時先出來闖...
timing 錯曬喎.
其實係架. 一年前和現在的timing差好遠.
不過, 不打緊, 我幾時有過好timing.
我又冇咁大想頭, 贏埋 the big short 果啲.
有想過將來返去嗎?
不想...真係有點悶...做了咁耐.
(我正式工作職函寫的工作範圍啲野, 真係好求其...但都只係阿媽係女人, 不會走偏門想害人.
非正式的, 現在還會認真, 因為借左錢俾人, 係好大劑架.
時代吾同, 啲股份按左俾你又點啫..subsidiary啲數簿吾俾你, 咪又死路一條, 搞幾年入除牌程序...係咪要玩咁大先...
所以好痴線囉...吾做正式的, 減一半人工, 但我仲有做非正式, 真係有value的部分呀!!)
同埋...以現在回頭草的同事為例.
係會隱約感受到..上面心裡瞧不起, 使人更加不使本.
到時真係任人魚肉囉...要熄機就熄機...想查你做過咩就查...
朋友說, 不如到時join franchise 做小生意.
都係一條出路既...
所以呢...要劃一條底線給自己.
出來後, 可以輸錢, 但輸到連乜乜加盟費的錢都出不起之前, 便要收手.
轉行做七仔店長, 珍珠奶茶店長...
有了這覺悟, 心情, 又再定一些.
忽想到, 如果那些年沒有向心儀的女子表白過, 那會有多好呢?
現在, 應該仲可以係朋友.
咁, 我就可以詢問, 借用她的肖像權和聲帶去推銷.
在店前, 擺一個易拉架, 真人高度大小, 有她斜斜地側著身子, 著上最新一季的christian dior, 啜著奶茶, 眨單眼, 散發著自信, 快樂燦爛的笑容.
揚聲器一邊重複播放她的聲音" 好味, 好味... 我中女姐姐真心推薦, enigmady 店既古早味珍珠奶茶好好味, 快啲埋嚟買番杯飲喇..."
有她這個很漂亮養眼的生招牌, 一定好過招財風水貓, 一個月回本加盟費, 應冇難度.
