Cherish 36

 (i)

5-9-2022

今晚冇美巿，去了看明日戰記。

算係咁，第一次拍到咁冇乜好鬧，咁先值得支持，好過彭浩翔早幾年那套賀歲片標榜拍給香港人睇但拍套垃圾出來賣情懷，之後更….。

平心而論，係有吾少尷尬位和情節，但願意包容，等佢哋成熟。

但如果套戲可加多一至兩場床戲，例如我以前想追嗰條女，for example 即搵Sxxah，同古生有床戲，兩個人咀呀，滾下床單呀，咬脣大特寫，之後食枝煙，就真係接近美國科幻片水平了，亦吸引好多，至少我想睇。

吾係吹水，條女肯定後生、可露性?? 高過Tom Cruise 個Maverick嗰條阿婆囉。

今次搵個小妹妹sell 父女橋係爭啲。

——

呢排做槍手幫工作室老闆間熱狗店寫OpenRice。

我發覺自己埋沒良心的程度同以前寫股評冇分別。

Btw 舖頭啲新嚟part time 吾認得我，吾俾8折我，又吾好意思撻朵，我識你老細，始終生意差，我亦要臉。

但我心裡爆曬粗，正價我就吾會係到食啦，屌！

呢兩日寫完，兩個禮拜都吾落去食喇。

-----------

我係咪真係失去看舞台劇的興趣呢?

潘生入主劇團並有新戲上,  自己居然因為冇購票優惠碼而沒衝動去買飛.

或者吾係爭幾十蚊, 而係, 想到大熱天時去西九, 好熱, 就想放棄了.

吾去看劇, 就再沒機會看到她啊.

你又知她看那場? 我又不會伏她會看那一場, 我又吾係變態, 我亦不允許自己這樣做.

以前遇見, 真的只是巧合, 那時大家習慣看劇的時段差不多, 最高的紀錄是連續三日, 去到澳門都撞正.

況且啊, 如果她已移民,  我睇足咁多場都係不會遇見的.

報紙說 , 專才都去了新加坡, 不會在留在這裡坐口罩監受罪.

(ii)

9-9-2022

如果你網購, 寄來的產品和原本所訂的有出入,  但卻沒有不滿不高興, 會是甚麼原因呢?

我就會想到,  " 呀, 個店家都幾有眼光, 知我長得似BTS 的V ?!!!! , 所以先送錯把Jennie 當成Rose 俾我."

咁都俾我附會得到 , 我仲有乜好抱怨呢.

只要本命Jisoo 冇錯, 我也不會太介意.

中秋, 不用獨自度過了.

--------------

今天臉書, IG 都被事頭婆過身新聞洗版.

老人家96 歲, 屬笑喪,  今年亦早藉著登基 Jubilee 慶典,  舉國慶祝/ 提早跟佢farewell.

都是自發的.

有新聞報導,  有人難過的原因是, 事頭婆是佢生命中的constant, 現在終於變了.

也是的, 做了幾十年人, 甚麼都會變, 變得輕易,  但事頭婆依然是佢, 那是一種穩定感覺, 具象徵意義.

忽然我會想到, 為甚麼我這麼多年一直都慶祝她的生日?  即管當事人完全不知情, 甚至現在她人都快半百了,  並連她在不在香港都不曉得了.

大概, 曾經喜歡她, 於自己也具象徵意義, 記錄曾經的自己 -- 曾遇見過一個初見便動心著迷的女子,  有願意相信, 可以相信的感覺. 

btw ,在中國人的地方, 其實比英國更厲害, 典型的超英,  "凡官員/權貴/ 有牌爛仔死了, 都屬笑喪"

(iii)

10-9-2022

大概察覺自己近數月過得有點頹,  所以買了好容易訂的舞台劇票,  開始看番劇.

當然, 是不可能重回以前逢劇必看,  每個星期都看的熱度,  但總想一兩個月看一次的程度.

令生活想有點變化, 在等待大變之前.

睇乜就無謂寫,  免得寫到好似好多選擇咁,  今日仲有飛賣, 啲位又吾係太衰, 咪得一兩齣.

其實, 想看多一次The Audience,  a tribute to the Queen.  如果劇本可以續貂, 加番呢10 年就完美了, 但應該好難寫, 至少肥波好難寫但戲份應走吾甩, 若模仿呢位阿生文學修養, 對白應幾 mean 得嚟又中.

------

openrice 食評, 應可以升級去到二級了. 可以收工了,  寫呢啲其實好浪費時間.

幫工作室做槍手的食評出了,  但冇人俾反應,  係吾知我寫, 定係覺得我吾夠hard sell 讚好?

自己就幾滿意,  冇乜鱔味,  每個段落是中學中文作文的" 典範" , 即每一段都可以找出重心主旨及目的.

(後來出來工作,  心諗,  屌, 邊撚個寫野可以寫到有主旨, 重心思想...你俾到份係咁寫既 research report? 我就試過 "中X中央會議國務院XXXX 發展XXX" 提倡, 用長過水蛇春的攝字數就有 )

啲人應該吾明白, 其實呢個世界最仆街的評論, 並吾係一面倒讚好/ 彈,  而係扮中立和理性分析, 小罵大幫忙.

(iv)

17-9-2022

解決了今年裡拖延症的其中一件還沒做的事.

是拜祭.

從那裡八卦又多口的工作人員得知, 原來今年只得我有來拜祭亡母.

所以, 我都不算最懶的吧?  今年天氣真的不想讓人出街,  一星期裡, 我整天沒出門口是閒事.

沒有甚麼好同母親說,  說了又做不到,  自己都尷尬.

看著那些過去一年新的壁龕,  開始都有些人年紀比我小的, 已行先一步.

在燒衣紙的時候, 忽然我又會想,  這個世界,  其實,  還有甚麼是可以值得相信?

(v)

17-9-2022

BP 出了新碟, 感覺如何?

我認吾到風格啊, 你係會分到呢隻碟和The album 分別, 不像twice , 最近兩張大碟撈亂也不覺有分別.

自己最鍾意tally ,  I say fuck it when I feel it ,  4個人輪流fuck it , 很有新鮮感,  跟住typa girl , 我完全估吾到Jisoo 可以唱那個音域,  一直以為只Rose得,  可能有少少後期 tuned,  然後是the happiest girl, Lisa 唱得很calm, JISOO 原來可以唱假音.

主打歌,  shut down 歌詞真的DISS 到好狠, 打臉打到應,  特別是時尚資源是 request  吾係buy , 呢個真係冇得拗, 送俾佢地著, 就當打一次全球廣告, 淨係咁已收回, 仲未計假如每個大洲都有一個癲的, 佢地著乜都跟單買, 那也保證回本 . 

今日才見到, 有品牌IG story share 佢地剪爛個品牌件衫做MV 服.  件事其實好weird, 你間舖件衫俾人剪爛曬個design , 你仲要高高興興share , 多謝人地剪爛件衫.

繼續有人罵怎不讓JISOO 出SOLO,  依家Rose 有3 首,  LISA  2 首,  JENNIE 1 首,  JISOO 0 首,  在演唱會會尷尬啊...我估JISOO 未必, 真係fans 應覺得, 佢真係知佢想要乜, 已過左人有所以有的階段, 反而覺得可以唱乜都得是樂趣 , 才符合佢奇怪的性格.  諗下,  幾十場演唱會都係唱同一首歌, 係悶架,  依家佢想轉唱另一首cover , 今時今日實可以轉, 咁咪幾好.

與其說不讓出,  我現在更相信是JISOO 真的吾急,  有要求,  未滿意SOLO 方式才作罷.  畢竟雖在團裡墊底, 但也只是墊3 人, 放出去,  因為fan base 更大, 吾係Jisoo stan 其實吾少都鍾意佢,  所以未必輸得過IU , 咁已好夠啦, IU 喎, 其他女歌手已是第二梯次.

若你聽過今次大碟會更加肯定.  佢地真係team first,  視自己為一個vocal instrument, 著重自己怎賦予首歌加分多過自己唱多少秒, 不過啲編曲真的可以creative 少少. 

---------

呢排有冇睇電視劇?

好少,  也就是一排狂煲劇後, 季節性不想看.

黑話律師冇睇,  不想看懸疑劇, 估邊個係大老鼠, 最後發現ON 9 係自己  // 個編劇一按" 智商" 制, 個個奸角都變蠢,  咁睇劇會好無癮.

今日動漫,  感覺好正義/熱血 魔人,   但我卻只想放負.

做得好,  好無聊.

說出你的願望,  想睇, 但冇mood.

看得最多是地球遊戲室, 甚至是達翻看的地步,  真的好好笑, 看完會放鬆, 自己也的確因此被安俞真圈粉, 佢真的好好彩,  第一個擔綱的綜藝遇到好多好人,   特意番看以前及其後的綜藝,  佢真的安靜好多,  也對其他出演好感度提升不少, mimi 跳舞好堅, 未必差過lisa.

(vi)

4-10-2022

近數年, 多了戀愛綜藝節目, 歐美韓都有,  自己從不會去看,  直覺很無聊, 造作, 搵戲嚟做.

忽然想, 假如有美女與痴漢的組合,   電視台會不會找Sarah 和我呢?

嗯...我一定會在節目裡變心, 九秒九, 快過川劇變臉.

今天去看劇了, 如果她數年前的習慣沒變,  應該不會遇到.

遇到, 不遇到, 其實又如何呢?

----------

開始追回 "我們的藍調時光".

劇本寫得很好, 把人性中的矛盾又複雜呈現出來,  令每個角色都有血肉.

挺好看的.

(vii)

5-10-2022

晦氣到極的一天.

但發脾氣都冇用架.

同佢鬥長命, 佢老味, 投降沽左佢,  真係過吾到自己.

-----------

當我遇見妳後, 我才發現自己的數學不好只是錯覺.

看見妳的一瞬間,  我便把妳加進我的心裡.

如果我靚仔既話,  你話幾好,  用嚟冧女一定掂.  (真係靚仔,  望一望, 啲女已湧埋嚟架啦)

可惜, 可惜.

(viii)

17-10-2022

最近的兩個星期六晚, 都出去跟朋友聚舊, 有熟有吾熟.

熟的是剛過去的周六, 跟3 個中學同學打邊爐, 五六年冇見,  怕佢地吾記得的程度, 直接開佢地全中文名打招呼, 慎防詐騙.

也很好約, 一日內便約定時間地點, 亦不用溫馨提示吾好甩底.

是我主動說要去排walkin , 但結果比約定時間早半個鐘去到火鍋店, 卻被告知, walkin 都冇得你排... ( 咩事, 經濟吾係好差咩...全晚full bookin?!!!).

當下即whatsapp , 問佢地用不用轉場.

結果, 兩個舊同學居然說,  各自都攞左籌.

是有少少感動,  一向呢啲場合, 左推右推, 都推吾郁人做呢啲野,  今次, 卻是有人默默主動做了, 到我呢條友搞吾掂才告知, :攞左籌啦.

整晚說話也很自在.

自在到, 甚至跟其中一個再上星期已見過的朋友說,  ""其實, 我吾係咁想下星期去行山, 原因係好攰呀, 連續三個星期出街, 同嗰班人又吾係真係咁熟..."".

結果, 朋友屌柒我, 佢最憎我呢挺人,   吾想去就直接講啦,  都幾十歲人, 吾想就直接話吾去,  吾好吾想去又係到拖,  一直係個group 吾出聲,  拖到其他人開口話吾去喇, 然後立即表態又吾去, 咁好仆街架.

咁, 我都知我咁其實好仆街, 但就是吾怕俾當事人朋友知我仆街, 都直接講出來,  又吾覺得俾佢兜頭屌柒有咩野, 那種感覺挺好的.

其中一個同學, 大女中二, 小女才幼稚園,  我可以直接說, 咁你係屋企係咪冇地位?! 佢推說, 都吾係既, 慢慢講, 以事論事, 係經濟壓力大啲啫, 冇乜野 , 然後我心裡妖, 係到遊花園,  並即秒回,  有野就呻啦,  呢度仲吾呻, 響邊度呻...屋企三個女人, 你冇地位係好正常架...

那種自在是久違的.

最後, 我甚至會提出大家影合照,  約定一年最少見一次.

自己原來很懷念這種 gathering.

很久沒有這樣子說話和隨意.

也意識到, 自己現在其實並吾係吾鍾意social,  只是對人常感到心灰意冷, 提不起勁.