今天早上三點便起床, 嗯, 想清醒了一小時才出門, 免得太趕甩甩漏漏.
四點出門, 在巴士站見到有人排通宵機場巴士, 不過都吾理啦, 去飲早茶先啦.
吃了佬味十足的盅頭飯, 兩籠點心.
好飽.
離老遠看見有巴士駛近, 半夜三更會行駛的, 咪得幾條巴士線, 所以快步閃回巴士站.
Yeah...
機場巴士需時頗久, 以前搭UBER 或的士, 車程不過半小時不到, 現在卻搭成個鐘, 還要好彩有車即上喎....
不過都好的, 原來很多香港人晨咁早就要返工, 仲要去咁遠, 機場附近的建築物, 一點不似身在香港.
落機後, 第一時間check wifi , 咩事呢, 又detect吾到喎...試過幾次跟足指示也不成功.
從錯誤中學習, 上次在東京沒有在機場處理便入巿區, 結果手尾長, 今次怎都要解決了才入巿區.
在機場counter 買過數據卡. 300 台幣變任用三日, 抵過在香港3 的, 又即場幫你即插即用, 保證用到...
以後, 去台灣都係落地先買數據卡.
買完卡, 本想去櫃員機唱錢, 但打開銀包才發現, 自己把提款卡留在香港. ( 每次旅行, 都不會帶所有的信用卡, 提款卡出門, 防止真的丟了銀包, 一鑊熟的risk control).
左摷右摷, 數數身上還有多少台幣紙鈔, 1700啊...
講真, 若只用兩日, 都勉強夠用的, 但只能吃牛肉麵咁囉.
咁唯有唱現鈔啦.
以前旅行剩落的美元, 人民幣, 今次出門都有帶來, 純粹想像中, 萬一帶不夠錢, 用來唱掉, 反正大概有很長的時間, 都不會去用美元, 人民幣的地方旅行. 今次真係俾我用到喎, 唱多1000港元, 挾埋18000台幣, 吃昂貴的餐點是沒可能, (上次的鐵板燒A5 和牛....) , 但平民化消費倒已足夠應付了.
來到車站, 也把握機會, 把這些年累積的台幣散紙 (次次去台北都忘了帶回來, 結果儲了成袋...) , 一抓一把, 隊俾服務員增值, 都有499 台幣啊, 可見我真係好Q 多10元, 5元的台幣...
(咩樹我咁神心托了成袋台幣來台北? 係愛定係斷捨離呀？係窮呀...潛意識中, 知道我會瀨野...)
不過到最後, 服務員都藐我, 因為那袋散紙中, 混入一個澳門幣....
即係, 以前排日本有間硬幣抽蛋機店, 大大隻字叫人吾好用香港五蚊去呃部機話係100 YEN 之類的無恥行徑....
我點知啫...(發惡mode)
不過, 我真係好吾想收澳門幣...
來到台北車站, 印象中, 可以從車站直接行去酒店. 從地圖咁睇吓...
結果都係, 如果只係用機場捷運嚟計. (在捷運/高鐵那邊計, 就行到PK)
從機場捷運出, 朝松山新店線方向走, 行到去北門站, 方便又易認, 又吾似行番去捷運那邊再搭車咁遠, 基本上一出機鐵捷運出口, 便望到酒店了.
不過若是高鐵, 捷運那邊行過來, 則幾遠下... 走地下街Y 區, 基本上是走勻成條街咁遠...條街雖好Q長, 但冇野睇的...好落後, 資源地段錯配, 吾係東京那種地下街, 一次半次都還好, 日日都咁行, 都幾厭世....
所以若從酒店去忠考復興那頭, 我試過, 得出的結論係寧願在北門站轉兩程車, 都吾好從酒店行番去捷運搭板南線...轉兩程車都吾會行咁多路...行死架...
來到酒店時, 才十時許, 幾尷尬的時間, check in /食飯都未夠鐘, 於是去了一樓的型格cafe hea一會.
那裡的擺設收藏都OK 的, 有些是以前看當代affordable arts 見過的.
不為意看了擺了甚麼書, 有瓊瑤姐姐的書呀..." 我恨你, 恨你鑽入我的心扉中, 讓我不得不愛上你..." 諸如此類...混在這些藝術品中, 瓊瑤姐姐都變得型格, 不煽情肉麻.
快到11點, 便離開酒店, 去了六張犁 , 去吃明月湯包.
只要吾係搞錯基隆路二段的方向, 從車站一出一路走, 走了好一會, 便會望到.
燉雞湯, 真係好得, 湯底有輕微藥材味, 但只見有薑片, 雞肉一挾即和骨頭分離, 幾有火候.
湯包的汁不算誇張, 但吃下去, 是吃到豬肉的鮮...香港啲豬肉, 冇味的...
炒飯OK啦, 至少不油, 基本上米米分明.
問店員, 通化街總店有多遠, 佢地話呢間係總店喎... 同食評網講吾同的...
吾理啦, 反正通化街那間, 從地圖上看, 本來不容易找, 難得有分店係條大馬路.
吃完後, 再往前走, 經過一排寵物店後, 便見到臨江街夜巿的模樣.
心想, 啲菜係咪算平架? 生活指數咁睇, 高不高?
不過, 我不會買這樣賣的豬肉, 始終不是舊時, 就咁在路邊吊起的豬肉, 感觀上衛生麻麻.
穿過街巿, 便來通化街...不去找明月湯包總店在那裡, 只見有人在排可不可紅茶.
心想, 遲早有一日, 香港都會有加盟店, 依家飲定先, 感覺會良好!?
都幾好飲的, 啲茶味, 但只揀半糖好啦, 正常太甜, 店員都warn我.
我鍾意飲呢個, 多過飲珍珠奶茶.
繼續漫無目的地走, 結果行去了台北101 那頭.
見大班學生看教育資訊展覽, 是免費進場的, 所以也跟了入去, 借洗手間用.
去完, 也在展覽館逛了一圈.
咩事呢, 俾學生睇的, 但咁多女著到咁火辣....
乜資訊展都要咁?
再看那些學生團最後看了那些攤位...不由得感慨成長的洗禮是，成班中學生以為入場睇電玩、睇靚女，實際帶隊的老師只會帶你去睇最無聊的政府部門策展的攤位, 佢地只係俾人用來做人頭篤數...
我又乜事係咁影show girl 的相?
無聊囉...
咁樣, 我吾係似番啲個毒撚阿叔咩?
btw, 我都吾係幾明, 點解要啲女著成咁做show girl, 雖然我都OK prefer咁望.
車展, 都可以話有車就有女啫...所以我冇女...淚...
買個電腦火牛, 條女著成咁, 把托呀...見到條女, 真係要散熱?!
後來, 也行了一圈世貿101.
很似圓方 ICC 的地方, 很悶.
我有沒有俾錢, 上去展覽台?
你當我痴線架...
回酒店check in時, 在台北捷運站落, 結果瀨野, 在台北車站行錯路... 所以我先話, 寧願轉幾程, 都吾好在台北車站出, 條路又長, 行錯方向又hihi...
我一回到酒店, 第一時間吾係check in, 而是即刻踎在大堂(酒店大堂好細, 冇位坐), 打開電腦, 做衍生工具實時報價數據資料備份, 期指對盤, IG 期貨, 油金匯呀收咩位...
咪當我真係吾使做得架...
不過都係遲了一分鐘...
算啦.....都盡了力....而其實又吾會真係太影響...只係達吾到自己的要求.
上了酒店房間, 都OK 啦.
不過俾我揀, 我下次係住番上次大安區間HOME.
酒店的窗外景觀係好過上次那間好多的, 張床可以打橫訓, 間房係新淨啲, 只係浴室太普通, 沖涼洗頭都係同一枝, 冇熱水壼, 冇咖啡茶包供應, 洗手盆和睡床只有一道簾相隔. 便利店要行5分鐘才有, 附近又冇乜野食. 工作枱很細, 不方便做野用電腦.
這間酒店的賣點, 真係近機場捷運, 裝修型格, 同埋去中正紀念堂夠近, 吾使轉車.
若要在台北玩幾日, 食野, 都係去番大安區那頭方便啲. 當然你若有錢包車, 住邊都得, 等於文華東方, 吾方便搭捷運一樣, stay得那裡, 仲會同你逼捷運咩...
原來, 還有很多人在玩pokemon go, 成條街都圍埋一齊打擂台.
餐廳在忠孝敦化...即上次食鐵板燒那個站....可惜....身上得萬幾蚊台幣, 不過現在就算有幾萬, 也不會吃那麼貴的晚餐了.
串燒店手勢是幾好的, 性價比OK, 跟店員說起我是跟健吾推介來, 並讓佢看那篇文章, 佢問我怎麼不吃炸麻糬, 我說一個人食吾到咁多 , 我已叫了好多野啦, 佢在我埋單後, 留了我一會, 說要請我吃一件...
好開心, 不是有得吃免費, 仲要好好吃, 而是當中的人情味. 你估我會帶來宣傳效果咩.
回到酒店, 玩了一會浴室燈色, 追回野獸第八集, 便睡了.
點解要咁玩浴室呢? 是時下的情趣遊戲?
唉....
看著枱頭那盞燈, 不由得想起孫燕姿的天使的指紋.
那張還未開的燈.
只是沉默, 然後吐了一口氣.
翌日, 早上三點醒來, 睡不回去, 便寫寫字, 來到現在已六時.
天將要亮了.
沒有留言:
張貼留言