(i)
5-6-2022
上月下旬看的舞台劇, 好像是大半年以來首齣.
整體水平不錯, 沒有扮野, 也沒有夾硬唧人笑, 沒有扮女人, 基佬, 節奏拿捏也不錯, 真挈地分享了那個年代的回憶.
雖然我不能體會那個年代青少年拍拖的節目, 例如唱K, 去長洲 ( you know, 我係零系), 但我都有過一件scene 的.
回到劇場, 有點陌生, 不過還是喜愛待在那裡的感覺, 完全脫離外界的放空.
雖然仍是喜愛, 但自己卻沒有再訂任何一場近來會上演的劇目.
主要是,我覺得累.
直到星期六晚上都未必能夠回魂, 最好的時間, 是星期天下午.
但又會想, 已習慣了周末日呆在家中, 足不出戶, 覺得出街好煩.
我變得很頹, 頹到即使知要買老花眼鏡, 但都懶得出門行遠少少, 所以現在看手機仍是很不方便.
日式即日拿取的眼鏡店, 經過上一次經驗, 我抱了戒心不想再光顧了.
(ii)
5-6-2022
再頹的人, 都會有人約食飯.
自從三月下旬後, 便沒有和別人一起吃飯, 不過這周卻吃了兩次.
舊同學, 舊同事.
從前, 人們會用星座去判斷一個人的性格, 彼此之間投不投契.
現在, 我覺得用打乜針會更加準.
我覺得打吾打, 幾時打, 打乜針, 都反映了一個人的價值判斷/模式, 生活圈子, 準確度遠比星座為高.
舊同學不算藍絲, 但卻會打科X, 並覺得佢啲同事都打科X, 所以不覺得有問題.
整晚聽到的大意都是, 他不是不知啲人幾咁冚家鏟, 但生活係咁架啦, 安心守好自己的一分田就算.
我覺得好難溝通, 但亦知the most painless option 是如他所言, 如果要繼續活在這裡, 所以無謂拗.
舊同事, 則是打復XX的一類人.
是投契得多, 雖然餐飯吾知在"告急"黃店食乜九, 人均400, 卻人人都半餓離開, 轉場去酒吧再下一輪.
選昨天, 也是有目的, 雖然整晚都不曾談這件事.
識了17 年, 三隻手指數得出星期六會出來食飯, 怎會是偶然呢.
不過聽到他們七月會去英國買定樓, 煩緊竉物搬去澳洲要檢疫 2星期難題, 卻讓我有點失落.
我有時候察覺到自己有害怕被dumped 的恐懼, 所以反向地,安於一人, 也有以下的心態.
"對任何人來說, 都是過客, 不會被珍惜挽留."
如果是正能量, 更應珍惜當下與人相處見面的每分每秒 etc.
如果放負, 則會想, 反正最後都是離別, 現在也沒甚麼好積極主動, 所以也別計較, 以為自己是甚麼.
並不是不想選前者, 但有時候, 別人的態度如果係冷漠, 你係好難繼續自燃, 保持珍惜的能量.
畢竟, 我只是一個普通不過的人.
(iii)
5-6-2022
食代餐能不能減肥呢?
我開始有點懷疑.
吃了兩星期, 體重好像原地踏步.
為甚麼開始吃代餐做午餐.
首先, 亦是最重要的原因, 吾使煮, 清洗也算方便.
這兩年, 自殺式煮食兼帶飯, 真的點厭了.
要煮得好食, 是要時間和心機.
看youtube 睇人煮左, 當自己食左就好.
其次, 吾使諗亦平, 亦吾使落樓行出去曬/淋雨. 一包代餐沖包 30 幾蚊, 你若要食正常午餐, 可以買到乜食呢又?
第三, 才是減肥, 真的是過重了, 在欠缺運動下.
雖然應該減不到, 不過自己的精神倒是好了一些.
也是支持自己繼續吃代餐的原動力.
(iv)
5-6-2022
因為食代餐, 所以在 youtube 裡, 近來多看了煮食的短片.
看了當然不會跟着煮, 但能從中理解一些煮食基本原則, 也知道廚具如三德刀, 日本夾木芯砧板, 以至怎樣斬雞去骨, 浸發海味 .
看多了, 也想起很久很久之前, 還曾經憧憬有伴侶後的生活想像.
在她工作後回家, 讓累透的她坐在按摩椅休息小睡, 腳下浸著紓緩疲勞的足浴鹽水, 聽著soft jazz , 等待我為她準備的晚餐. 讓她吃好, 休息好, 於我是一種小確幸.
當然, 我知道這種生活想像, 現在距離自己已經太遙遠了.
也不能跟別人說起, 要不然成件事, 就變成意圖投毒騙保險賠償了.
my fate.
(v)
6-6-2022
渣打asia miles 你好野.
早兩年用哩數兌機票, 後來疫情比預料還久, 沒得去, 自己亦忘了冇搞退回哩數, 剩餘的亦基本上冇用過而expired.
今年則說我吾夠資格豁免年費, 逼我cut 卡.
即我呢幾年簽卡儲積分的行為是白做, 早知揀換錢嗰啲卡好過.
唔, 冇得拗既, 我都知, 所以都廢事拗, 佢吾waive 就cut 卡算.
你若係佢地的target customer, 你估佢會吾會咁對你呀.
我吾係, 先至會逼我 cut 卡, 節省行政資源.
我都明既, 呢兩年碌卡最多係凍肉舖, 惠康, 阿信屋, HKTMALL, 老麥, 大家樂, 銀行會收到拆帳咩, 佢地都係白做, 有機會梗係吾做我生意啦.
我若日日係連卡佛碌卡, 你估佢仲會吾會吾豁免?
雖然明知運作係咁, 但還是想吐糟.
X 你, 當初你搵鄭秀文拍廣告時, 個氣氛吾係咁勢利, 係好enjoy 好cheerful, lively, 寫意, 享受生活架喎.
家下我只覺得我係水魚.
---------
常看youtube 煮飯頻道最大的得著是電視節目教人煮飯的, 全部都係食死人, 就咁跟住煮, 會好難食.
吾理TBB 定VIU , 鼎爺, 梁祖祖 都好, 我跟住煮, 都應該會食死人.
可見我的立論出發點, 不是政見或人的問題.
你吾覺得, 好多呢啲煮飯節目, 啲菜碼一上嚟就係, 完全已處理好, 節目吾會教你預先怎處理架咩? 煮食, 其實很講究細節, 特別是食材處理.
for example.
冬菰, 節目同你講你事前, 要浸水變軟.
大佬, 實際吾係就咁架, 而係先要沖一沖水, 洗走最污糟的, 然後才浸, 有必要時, 要用生粉抺一抺去洗深層次的污糟野架.
最讓我咬牙切齒的, 是凍肉, 班節目主持人仆街話, "從雪櫃裡拎出嚟解凍" , 吾會同你講, 要浸一浸鹽水, 僻雪味, 更不會同你講, 凍水"飛"水. 我年多前吾知,啲豬扒食到我hihi, 仲以為奄得吾夠重手, 落吾夠鹽...佢老味.
我會看的頻道比較多有麻煩哥, 吾熟吾食( 我好想要有一個好似佢咁的廚房) , 泰山, 職人吹水, 至於gordon rasmey , 則麻麻, 理由係同睇電視節目果啲差吾多.
沒有留言:
張貼留言